Берзанските индекси на Вол Стрит, пораснаа трет ден по ред, при што индексот СиП 500 (S&P 500) достигна рекордно високо ниво бидејќи спласнаа стравувањата на инвеститорите од ширењето на „омикрон“ варијантата на корона вирус.
Дау Џонс (Dow Jones) зајакна за 196 поени, или 0,55 отсто, и сега чини 35.950 поени, додека СиП 500 (S&P 500) порасна за 0,62 отсто, на 4.725 поени, а Насдак (Nasdaq) за 0,85 отсто, на 15.653 поени.
Растот на цените на акциите се должи на намалувањето на загриженоста на инвеститорите во врска со „омикрон“, по објавувањето на истражувањето дека постои помал ризик од хоспитализација и развој на теѓок облик на болест кај луѓето заразени со „омикрон“ во споредба со „делта“.
Ова ги охрабри инвеститорите, иако бројот на заразени со „омикрон“ брзо се шири во голем број земји и иако некои влади воведуваат рестриктивни мерки за да го спречат ширењето на оваа варијанта на ковид.
Инвеститорите ги охрабрија и добрите економски показатели. Вчера објавените извештаи покажаа дека трошоците во САД во ноември се зголемиле за 0,6 отсто, додека бројот на нови барања за помош за невработените, и минатата недела се движеше на нивоата од пред пандемијата.
„Денес тргувањето беше многу мирно, бидејќи инвеститорите здивнаа по веста дека ‘омикрон’ не е толку опасен како што првично изгледаше. Ова е позитивно при влезот во 2022 година. Дотолку повеќе што економските основи се цврсти“, рече Рајан Детрик, стратег во компанијата „ЛПЛ“ (LPL Financial).
Божиќ ги затвори берзите
Порастот на цените на акциите се должи и на вообичаеното подобрување на портфолиото кон крајот на годината.
Благодарение на силниот раст во изминатите три дена, индексот СиП 500 (S&P 500) го зголеми својот профит од почетокот на годината на повеќе од 25 проценти.
На Вол Стрит и на повеќето европски берзи поради божиќните празници денеска не се работи.
И на европските берзи цените на акциите вчера пораснаа. Лондонски ФТСЕ индекс (FTSE) зајакна 0,43 отсто, на 7.373 поени, додека франкфуртски ДАКС (DAX) порасна за 1,04 отсто, на 15.756 поени, а париски ЦАЦ (CAC) 0,77 отсто, на 7.106 поени.
Голем раст на азиските берзи
На азиските берзи, вчера, цените на акциите благо пораснаа, четврти ден по ред, благодарение на растот на Вол Стрит и помалата загриженост за „омикрон“ варијантата на корона вирусот.
Азиско-пацифичкиот берзански индекс МСЦИ (MSCI), без јапонскиот, околу 6:30 часот порасна за 0,15 отсто, зајакнувајќи четврти ден по ред.
Притоа, на токиската берза индексот Никеи (Nikkei) стагнираше, додека цените на акциите во Шангај се лизнаа за 0,5 отсто. Но, во Хонг Конг, Австралија и Јужна Кореја тие се зголемија меѓу 0,1 и 0,6 отсто.
Последниот ден пред Божиќ на азиските берзи се тргуваше мирно, а некои работеа со скратено работно време.
Доларот ослабе, цената на нафтата порасна
А, на девизните пазари вредноста на доларот во однос на кошницата валути падна.
Индексот на доларот, кој ја покажува вредноста на американската во однос на другите шест најважни светски валути, се движи околу 96,02 поени, додека вчера во овој момент изнесуваше 96,05 поени.
Притоа курсот на доларот во однос на јапонската валута порасна од вчерашните 114,10 на 114,30 јени.
Американската валута благо зајакна и во однос на европската, па цената на еврото се лизна на 1,1335 долари, додека вчера во овој момент изнесуваше 1,1340 долари.
Цените на нафтата, пак, паднаа по вчерашниот силен раст. На лондонскиот пазар цената на барелот се лизна за 0,8 отсто, на 76,20 долари, додека американскиот пазар поради католичките Божиќни празници не работи.