Страшно невреме ја зафати денеска Флорида, соопшти денеска Националниот центар за урагани.
Ураганот „Никол“ стигна на копното на полуостровот, на околу 25 километри северо-северозападно од Форт Пирс и е придружен со ветрови со брзина од 120 километри на час, се наведува во соопштението на агенцијата со седиште во Мајами.
„Никол“ вчера прерасна од тропска бура во ураган од прва категорија кога ги погоди Бахамите.
Како што информира Ројтерс, на жителите во најмалку три окрузи на Флорида вчера им било наредено да се евакуираат од островите во близина на Флорида и од ниските области и да ги напуштат мобилните домови.
Десетици луѓе беа евакуирани вчера од загрозените локации на северозападните Бахами додека „Никол“ се приближуваше до островот.
Официјални лица на Бахамите известија дека само неколку луѓе се наоѓаат во дваесетина отворени засолништа, а во Абако биле пријавени поплави и прекини на електрична енергија.
Инаку, Никол е првиот ураган по речиси 40 години што доцна стигна до копното на САД, дури во ноември, кога сезоната на урагани е веќе главно завршена. Последниот ураган што пристигна доцна беше ураганот „Кејт“ во 1985 година.
(Фото: АФП)
