Северна Кореја тестираше нов подводен нападен дрон способен да носи нуклеарно оружје, објавија денеска државните медиуми, а лидерот Ким Јонг-ун предупреди дека заедничките јужнокорејски и американски вежби мора да престанат.
За време на тестирањето, новиот севернокорејски дрон вчера крстосуваше под вода на длабочина од 80 до 150 метри повеќе од 59 часа и детонираше ненуклеарен товар во водите во близина на источниот брег на Северна Кореја, објави севернокорејската новинска агенција КЦНА.
Аналитичарите велат дека Северна Кореја покажува се поразновидна нуклеарна закана за Вашингтон и Сеул, иако тие се скептични дека подводното возило е подготвено за употреба.
Северна Кореја има намера да им сигнализира на „Соединетите Американски Држави и Јужна Кореја дека во војна, Пјонгјанг ќе има голем број потенцијални средства за детонирање на нуклеарно оружје за кои сојузниците би морале да бидат загрижени“, рече Анкит Панда, висок соработник во Институтот за меѓународен мир „Карнеги“.
Подводно торпедо
„Ќе има подземни силоси, вагони, подморници и ‘патни’ мобилни лансери за проектили. А сега и подводно торпедо“, рече тој.
Во понеделникот, изолираната земја лансираше ракета со краток дострел од подземен силос, што е отстапување од вообичаените методи.
Наречен „Хаил“ или „Цунами“, новиот систем подводни пловила без екипаж е наменет да спроведува тајни напади во непријателските води и за уништување на поморски ударни групи и главни оперативни пристаништа со создавање голем радиоактивен бран преку подводна експлозија, неведува КЦНА.
„Овој нуклеарен подводен напаѓачки дрон може да се распореди на кој било брег и пристаниште или може да биде донесен со брод“, пренесува новинската агенција, додавајќи дека Ким го надгледувал тестирањето.
Јужнокорејски воен претставник изјави дека ги анализираат тврдењата на Северна Кореја.
Американски официјален претставник, кој сакал да остане анонимен, истакнал дека нема индикации за нуклеарна проба. Не е јасно дали Северна Кореја во целост развила минијатуризирани нуклеарни боеви глави потребни за нивно помало оружје.
Аналитичарите велат дека усовршувањето на таквите боеви глави веројатно ќе биде клучна цел ако Северот продолжи со нуклеарните тестирања.
Огромни торпеда
На фотографијата која ја објавија државните медиуми, Ким се гледа како се смешка покрај голем објект во облик на торпедо, но објектот не е идентификуван како нов дрон.
Други фотографии покажаа траги од подводната траекторија на објектот и експлозии видливи на површината на морето.
Панда вели дека оперативниот концепт на оружјето е сличен на руските нуклеарни торпеда „Посејдон“, на новата категорија на одмазднички оружја дизајнирани да создаваат разорни, радиоактивни експлозии во крајбрежни области.
Денеска јужнокорејскиот претседател Јун Сук Јеол рече дека ќе се погрижи Северна Кореја да плати за нејзините „непромислени провокации“, за време на говорот на комеморацијата за војниците загинати во судирите со Северна Кореја во западните води, вклучувајќи го и потопувањетото на морнаричкиот брод во 2010 година. Јужна Кореја тогаш објави дека нејзиниот брод бил погоден од севернокорејско торпедо.
Северна Кореја, исто така, објави дека во средата истрелала крстосувачки ракети за да извежба „изведување тактички нуклеарни напади“, потврдувајќи ги претходните извештаи на јужнокорејската војска.
Најновите тестови се случија кога јужнокорејските и американските сили во понеделникот ја започнаа својата најголема вежба на „амфибиски десант“ во последните неколку години, во која учествуваше и американски јуришен брод.
Северна Кореја рече дека поради воените вежби на Соединетите Американски Држави и Јужна Кореја, таа мора „да се опреми за сеопфатна војна и да ги зајакне своите нуклеарни сили и во квалитет и во квантитет на приоритетна основа“.
Севернокорејскиот лидер Ким изрази „својата волја да ги фрли американските империјалисти и јужнокорејскиот марионетски режим во очај заради нивниот избор“, соопшти КЦНА, додавајќи дека Ким ги предупредил непријателите дека треба да престанат со непромислените воени вежби против Северна Кореја.