Стравот од повторно појавување на Ковид расте после откривањето на новата варијанта за која научниците веруваат дека е „вистинската работа“, пишува „Дејли Мејл“.
Научниците веќе повикаа на враќање на маските за лице поради новиот вид на ковид кој допрва треба да биде официјално именуван, но засега се нарекува БА.6.
Други, пак, предупредуваат дека е премногу рано за паника и тврдат дека ограничувањата од периодот на пандемијата нема да бидат потребни.
Стапките на хоспитализација поради Ковид веќе почнуваат да растат, што предизвикува загриженост од можноста од нов бран.
Порастот на инфекциите следи по доаѓањето на новата варијанта наречена „Ерис“, што е веќе еден од седум нови случаи на коронавирус во Велика Британија, велат тамошните здравствени власти.
Експертите тврдат дека лошото време и „Барбенхајмер ефектот“, кој се однесува на филмовите „Барби“ и „Опенхајмер“, исто така, можат да придонесат за пораст на инфекциите и за слабеење на имунитетот.
Засега нема знаци дека новооткриената варијанта претставува поголема опасност од оние досега познатите, вклучувајќи ја и варијантата „омикрон“.
Подоцна оваа година во Велика Британија на постарите од 65 години и ранливите групи ќе бидат понудени дополнителни вакцини.
Нова варијанта на вирусот, се чини, веќе почна да кружи, а забележана е и во Данска и Израел.
Експертите мислат дека оваа варијанта има повеќе од 30 мутации.
Меѓутоа, сè уште не се знае дали оваа варијанта значително ќе се шири или едноставно ќе исчезне.
Д-р. Триша Гринхалг, експертка за примарна здравствена заштита на Универзитетот во Оксфорд, објави на Твитер дека се чини е „повторно време за маскирање“.
Професорката Кристина Пагел, математичарка од Универзитетскиот колеџ во Лондон, рече дека сè уште е многу рано, но оваа варијанта на корона вирусот има многу нови мутации кои ја прават поинаква од претходните видови и е потенцијално поспособна да предизвика голем бран.
