Фудбалскиот клуб Арсенал во завршницата од минатата сезона го „испушти“ пехарот во Премиер лигата, а најновите потези на раководството на лондонскиот клуб покажуваат дека нивните амбиции не се само титулата на Островот, туку и во Лигата на шампионите.
Прво, британските медиуми објавија дека Вест Хем ја прифатил понудата на Арсенал од 105 милиони фунти (120 милиони евра) за англискиот репрезентативец Деклан Рајс.
Доколку се реализира трансферот, Реис ќе стане најскапиот фудбалер во историјата на Премиер лигата.
Останало, наводно, двете страни само да се договорат за ритамот на исплати, а „топчиите“ бараат целата сума да биде исплатена во следните 18 месеци.
Рајс (24) има договор со Вест Хем до јуни следната година, а во овој клуб пристигна во 2014 година од Челзи.
Тој минатата сезона за „чеканите“ одигра 50 натпревари и постигна пет гола, а е еден од стандардните англиски репрезентативци.
И, не е единствениот што е на чекор да се приклучи на тимот на Микел Артета.
Поточно, во Арсенал вчера официјално премина поранешниот фудбалер на Челзи и германски репрезентативец, Каи Хаверц, кој потпиша долгогодишен договор.
Британските медиуми пренесуваат дека Арсенал на градскиот ривал му платил отштета од 70 милиони евра.
„Каи е играч со врвен квалитет. Тој ќе донесе дополнителна сила во нашиот среден ред и разновидност во нашата игра. Посакуваме добредојде на Каи и на неговото семејство во Арсенал“, изјави менаџерот на „топчиите“, Микел Артета.
Германскиот фудбалер ќе му се приклучи на новиот клуб на почетокот на јули, а во Арсенал ќе го носи дресот со број 29.
„Овој клуб има толку голема историја, се надевам дека можеме да постигнеме многу. Менталитетот во тимот на Арсенал е многу висок и можете да го почувствувате тоа. Тоа беше една од причините зошто беше толку тешко да се игра против Арсенал во последно време. Целта е освојување на трофеи и ќе дадам се за да го направам тоа за навивачите и сите во клубот“, изјави Хаверц.
Хаверц (24), пред Челзи настапуваше за Баер Леверкузен. Тој минатата сезона одигра 47 натпревари за „сините“ и постигна девет гола.
(Фото: АП)
