Со положување цвеќиња на гробот на Гоце Делчев во црквата „Свети Спас“ и пред неговиот споменик на плоштадот „Македонија“ во Скопје денеска се одбележа 145-годишнината од раѓањето на македонскиот револуционер Гоце Делчев.
На гробот на Гоце Делчев цвеќе положија премиерот Емил Димитриев, министрите за култура, финансии и за труд и социјална политика, Елизабета Канческа Милевска, Кирил Миновски и Ибрахим Ибрахими, делегации од Кабинетот на Претседателот на Македонија и Собранието на Република Македонија, градоначалник на Скопје Коце Трајановски и претседателот на Советот на Град Скопје, Ирена Мишева.
Цвеќиња положија и претставници од ВМРО-ДПМНЕ и СДСМ, како и делегации на повеќе здруженија на граѓани, општини и установи.
Гоце Делчев, визионерот кој пред повеќе од еден век го разбра светот како поле за културен натпревар меѓу народите, роден е на денешен ден во 1872 година во Кукуш, во семејството на Султана и Никола.
Се школувал во гимназијата во Солун и на Воената академија во Софија. Учителствувал во Штип, а како член на Централниот комитет на ТМОРО работел на создавање мрежа на бази, комитети и комитски чети на Организацијата.
Учествувал на Солунскиот конгрес на ВМРО во 1896 година, а до 1901 година бил задграничен претставник на ВМРО во Софија.
Делчев е убиен од турска војска, на 4 мај 1903 година во селото Баница.
