Една студија спроведена на престижниот лондонски „Империал колеџ“ сугерира дека новата ковид-19 варијанта, „омикрон“, која забрзано се шири, носи малку помал ризик на хоспитализација отколку инфекцијата со „делта“.
Во студијата се проучувал процентот на хоспитализирани на примерок од 56.000 случаи заразени со „омикрон“ и 269.000 случаи со „делта“. Сите случаи се потврдени со ПЦР тестови.
За лицата заразени со „омикрон“, веројатноста за хоспитализација е околу 15-20% помала отколку за оние заразени со „делта“ видот на корона вирус, покажаа резултатите од студијата.
Според истата студија на „Империјалниот колеџ“, луѓето заразени со „омикрон“ имаат 40-45% помали шанси да поминат една ноќ или подолго во болница од оние заразени со „делта“.
Резултатите покажуваат и дека веројатноста за хоспитализација на лицата кои претходно заболеле од Ковид е 50-60% помала од оние кои не го прележале вирусот.
Ризикот од хоспитализација е сличен за оние со „омикрон“ и „делта“ под услов дека примиле најмалку две дози од вакцината, покажало истражувањето.
Но, ризикот од хоспитализација е поголем за оние кои не примиле ниту една доза од вакцината, велат истражувачите во студијата.
„Нашата анализа покажува докази за умерено намалување на ризикот од хоспитализација со ‘омикрон’ варијантата наместо со ‘делта’“, рече професорот Нил Фергусон од „Империјал колеџ’.
„Меѓутоа, изгледа дека тоа намалување на ризикот ја анулира намалената ефикасност на вакцината против инфекција со ‘омикрон’“, додаде Фергусон, кој предупреди дека високата стапка на зараза со „омикрон“ може да доведе до зголемени барања за здравствена заштита доколку бројот на нови случаи продолжи да расте со иста брзина.
„Иако намалениот ризикот од хоспитализација за лицата заразени со ‘омикрон’ е охрабрувачка вест, ризикот од инфекција останува исклучително висок. Со користењето на бустер доза, вакцините и понатаму остануваат најдобрата заштита од инфекција и хоспитализација“, рече коавторот на студијата, Азра Гани.
