Британскиот премиер Риши Сунак во последен момент го откажа состанокот со грчкиот шеф на владата, Киријакос Мицотакис, кој го обвини својот британски колега дека го сторил тоа поради дипломатски спор околу статусот на скулптурите на Партенон.
Грчките власти повеќе пати побараа од Британскиот музеј трајно да ги врати 2.500 години старите скулптурите кои британскиот дипломат Лорд Елгин ги зел од тој храм на почетокот на 19 век додека бил пратеник во Османлиското царство.
„Не сум ниту малку задоволен што британскиот премиер го откажа нашиот состанок само неколку часа пред неговото одржување“, рече Митотакис во изјава за медиумите.
„Грчките ставови за прашањето за скулптурите од Партенон се добро познати. Се надевав дека ќе имам можност да разговарам за нив со мојот британски колега. Секој што верува во исправноста и праведноста на нивните ставови никогаш не се плаши да се соочи со аргументите“, истакна грчкиот премиер.
Грчката влада разговараше со шефот на Британскиот музеј, Џорџ Озборн, за можниот договор за позајмување на скулптурите, кои се долго време извор за расправии меѓу двете земји.
Мицотакис во интервју за Би-Би-Си во неделата се пожали дека разговорите за можното враќање на скулптурите во Атина не напредуваат доволно брзо.
Рече дека трајно чувањето на тие скулптури во Британскиот музеј е како да ја преполовиш „Мона Лиза“ и дека не станува збор за сопственост, туку за „повторно обединување“.
Претставник на британската влада, кој сакаше да остане анонимен, рече дека расправијата околу мермерните скулптури значи дека сè уште е несоодветно состанокот да се одржи.
Претходно, портпаролот на Сунак изјави дека нема планови за враќање на скулптурите.
Британската влада никогаш не размислувала да се откаже од сопственоста на скулптурите, тврдејќи дека тие се стекнати легално.
Законот не дозволува тој музеј да отстранува предмети од колекцијата освен во одредени околности, но ниту забранува позајмување.
