Откупот на бостанот за кој Владата обезбеди дополнителни два денари субвенции, тече без проблеми и во најдобар проблем. На сите откупни центри се даваат кантарни белешки и се води целосна евиденција.
Според министерот за земјоделство, шумарство и водостопанство, Љупчо Николовски, стабилизација на цената се очекува по 15 јули која количините лубеници на пазарот ќе се намалат.
„Бев на терен. Навистина имаме сериозен проблем со бостанот поради производството во околните земји, особено во Србија. Затоа веднаш, по сите средби со производителите и откупувачите, на итна владина седница ја донесовнме Одлуката за дополнителна субвенција од два денари по килограм продадени лубеници кај регистрираните преработувачи од 3 до 15 јули, кога и количините за пласман се најголеми.
Земјоделците укажаа дека токму овој период, од 3 до 15 јули ќе биде најкритичен и дека се очекува стабилизација на цената дури потоа што понудата ќе се намали“, рече Николовски.
Субвенцијата се однесува за откупна цена до максимум четири денари, но услов е и производството да не биде поголемо од 50.000 килограми по хектар што, секако, нагласува министерот, е максимум кој може да се достигне.
„Оваа мерка е по предлог на двете страни, производителите и откупувачите. Им понудивме и субвенционирањето по хектар кое можевме 100-процентно да го зголемиме, но ваквата опција не беше прифатена.
Затоа ја одбравме мерката дополнителни два денара, како што побараа производителите, а се согласија и откупувачите“, потенцира Николовски.
Укажа и дека цената на бостанот падна на три денари поради што Министерството за земјоделство итно реагираше и интервенираше.
