Капитенот на македонската фудбалска репрезентација Горан Пандев објави дека става крај на репрезентативната кариера по денешниот натпревар против Холандија на Европското првенство.
„Да, ова е мој последен натпревар во дресот на Македонија. Ова е крај на мојата кариера во репрезентативниот дрес. Мислам дека оваа генерација го направи најголемиот успех во историјата на македонскиот репрезентативен фудбал, и сметам дека е вистински момент да се збогувам од националниот дрес. изјави Пандев попладнево на официјалната прес-конференција во Амстердам.
„На моите соиграчи им посакувам да се пласираат на Светското првенство. Верувам дека можат да го остварат тоа, бидејќи станува збор за фантастични играчи, посочи Пандев.
Натпреварот против Холандија, денес со почеток од 18 часот, ќе биде 122. за 37-годишниот Пандев од неговото деби во националниот дрес во 2001 година во мундијалските квалификации против Турција.
Пандев ќе се збогува со националниот дрес како фудбалер со најмногу настапи и најдобар стрелец со во историјата на македонскиот репрезентативен фудбал со 37 голови, вклучувајќи го и историскиот прв на Европските првенства, што го постигна против Австрија на 13 јуни во рамки на првото коло од групата Ц на ЕУРО2020.
„Среќен сум што сум дел од овој тим, кој направи историја. Едвај чекаме да започне денешниов натпревар и да дојдеме до позитивен резултат, порача Пандев пред последниот натпревар на „црвено – жолтите“ на ЕУРО2020 против Холандија.
