Цените на нафтата минатата недела паднаа на најниско ниво во последните три недели. Инвеститорите не се склони кон ризик бидејќи централните банки продолжуваат да ги зголемуваат каматните стапки, па економскиот раст забавува, што може да ја ослаби побарувачката за нафта.
Цената на барелот на лондонскиот пазар минатата недела падна за 7,8 отсто, на 79,94 долари, додека на американскиот пазар цената на барелот падна за 7,9 отсто, на 73,39 долари.
Падот на цената, втора недела по ред, е последица на загриженоста на трговците за забавување на растот во западните економии, со оглед дека централните банки продолжуваат да ги зголемуваат каматните стапки за да ја ограничат инфлацијата.
Американската ФЕД минатата недела ги зголеми клучните каматни стапки за дополнителни 0,25 процентни поени, на највисоко ниво од 2007 година, додека британската и европската централна банка ја зголемија цената на парите за по 0,50 процентни поени.
Во јануари бројот на вработени се зголемил за 517.000, додека аналитичарите очекувале само околу 187.000.
Стапката на невработеност, пак, падна на 3,4 отсто, додека се очекуваше да порасне на 3,6 отсто.
Овие податоци покажуваат дека инфлацијата може да остане покачена уште некое време, што значи дека ФЕД или ќе ги подигне каматните стапки на повисоки нивоа отколку што се мислеше или ќе ги задржи на покачени нивоа подолго од очекуваното.
Поради ова, во петокот, кога беше објавен извештајот, цената на нафтата нагло падна.
