Повеќе од 100.000 луѓе, меѓу кои средношколци и студенти, пензионери и вработени во приватниот сектор, вчера повторно излегоа на протести низ Франција, изнесувајќи низа барања, вклучително и зголемување на платите, објави парискиот весник „Ле Монд“.
Протестите, организирани од синдикатите во јавниот сектор кои бараат повисоки плати, се надоврзуваат на најавите за нови собири во блиска иднина.
Според податоците на синдикатот ЦГТ (CGT), учествувале повеќе од 500.000 луѓе, од кои 175.000 во Париз.
Од друга страна, Министерството за внатрешни работи соопшти дека на национално ниво имало 146.000 демонстранти, додека париската полициска префектура регистрирала 28.000 учесници.
Во Марсеј и Тулуз, префектурите регистрираа околу 5.000 учесници во секој од овие градови, додека синдикатите пријавија 80.000, односно 20.000 луѓе, што секако претставува пад во споредба со претходните собири од 5 ноември.
Собири се одржаа и во Лил, Лион, Бордо, Стразбур, Ла Рошел и Мец.
Министерството за јавни служби соопшти дека во штрајкот учествувале помалку од три отсто од државните службеници – категорија што ги опфаќа вработените во министерствата, префектурите и регионалните управи за образование.
На претходниот собир, на 5 ноември, нивниот удел изнесуваше околу десет отсто.
Синдикатот CGT повика на нови акции во наредните денови. Тие вклучуваат национален протест на пензионерите на 19 ноември, како и протест поради високите трошоци за живот на 21 ноември.
Извор: Данас
Фото: Принт скрин







