Поради последици од разорните земјотреси, кои пред една недела го погодија турско-сириското гранично подрачје, без покрив над главата во југоисточниот дел на Турција останаа 1,2 милиони луѓе, соопштија вчеравечер од Кабинетот на турскиот претседател.
Се стравува дека досега веројатно од под урнатините се извлечени и последните преживеани.
Тринаесетгодишно момче вчера беше изнесено на носилки од урнатините во турската провинција Хатај, откако под нив поминало 182 часа, јави државната телевизија ТРТ.
На видеото што го објави телевизијата се гледа како волонтер го држи за рака.
Вчера, од рушевините на станбена зграда во јужната турска провинција Кахраманмарас, извлечено е и спасено десетгодишно девојче, 183 часа после разорниот земјотрес, јави телевизијата ТРТ Хабер.
А, во југоисточниот регион Адијаман, претходно, во рушевините беше пронајдено и извлечено шестгодишно девојче, 178 часа после земјотресот, објави турското Министерство за одбрана.
Вака долгото преживување на трите деца ги надмина сите вообичаени граници. Изгледите за понатамошни спасувања и преживувања се исклучително мали.
Преживеаните кои спасувачите ги пронајдоа во текот на вчерашниот ден имале пристап до вода, односно дождовница или снег.
Познато е дека човек без вода може да издржи околу 72 часа, после што животот му доаѓа во опасност.
Во меѓувреме, во најтешко погодените подрачја во Турција се подигнати 176.000 шатори. Агенцијата за катастрофи (АФАД) извести дека нивните работници поставиле повеќе илјади контејнери за домување.
Од подрачјата погодени од земјотресот досега се евакуирани речиси 400.000 луѓе, се наведува во информацијата добиена од претседателскиот кабинет.
Турската новинска агенција „Анадолија“ објави дека властите спроведуваат инспекции за да утврдат кои станбени згради во десетте од земјотресот погодени провинции се сеуште погодни за живеење.
„До вчера попладне, срушени се или мораа итно да бидат урнати повеќе од седум и пол илјади згради“, изјави Бану Аслан, директор на Одделот за градежништво.
Вкупниот број на потврдени смртни случаи досега е повеќе од 37.500, а над 80.000 луѓе се повредени.
Само во Турција бројот на загинати се искачи на 31.643, јавува „Анадолија“, повикувајќи се на АФАД.
Според податоците на Светската здравствена организација, најмалку 5.900 луѓе починале во соседна Сирија.
(Фото: Озан Косе – АФП)
