„Ракометарите на Еурофарм Работник вечерва во Битола одиграа високо професионален и тактички мудро подготвен натпревар и конечно се израдуваа на првата евро победа. Во 4.коло совладан е одличниот хрватски тим Нексе, тесно со 29:28, но во текот на целиот натпревар битолските фармацевти водеа.
Ракометарите и публиката во Битола силно ја посакуваа оваа победа која е „послатка“ бидејќи е извојувана во неизвесен финиш. Гостите во последниот напад имаа можност да извлечат бод од жешкиот терен во Битола.
Најефикасен играч на натпреварот е Анте Гаџа од Нексе со девет голови, додека во домашниот состав се истакна Невен Стјепановиќ со седум погодоци.
Тој по натпреварот кусо изјави дека оваа победа мотивирачки ќе делува во играта на тимот како на следните средби на меѓународна сцена, така и во домашното првенство.
На другиот натпревар од оваа група, Хановер и Татабања ремизираа 27:27. Табела во Б-групата по 4.коло: Нексе 6 бода, Татабања 5, Хановер 3, Еурофарм Работник 2.
