Експертите во повеќе шампони за суво миење на коса пронајдоа загрижувачки нивоа на хемикалии кои предизвикуваат рак.
Високи нивоа на бензен, канцерогено соединение, се пронајдени во марки и серии на суви шампони, се наведува во новиот извештај на независната истражувачка лабораторија „Валисур“ (Valisure).
Само минатиот месец, одредени аеросолни суви шампони, вклучително и некои производи од „Dove“, „Nexxus“, „Suave“, „TIGI“ и „TRESemmé“, беа доброволно повлечени од пазарот поради можно присуство на отровната материја.
Во понеделникот, на 31 октомври, „Валисур“ поднесе петиција до американската Агенција за храна и лекови во која се наведува дека меѓу 148 серии од 34 различни марки производи за суво миење на коса, 70% од тестираните примероци покажале мерливи нивоа на бензен.
Според нивниот извештај, 11 примероци имале преку 10 пати повисоки нивоа на тоа соединение (од 2 делови на милион), што е дозволената граница која Агенцијата ја пропишува за лекови.
„Меѓутоа, тестираните суви шампони не се лекови и не содржат активна фармацевтска состојка за тераписки цели, заради што секое мерливо откривање на бензен може да се смета за неприфатливо“, информираат од „Валисур“.
„Податоците од анализата на бензен со директно земање мостри од контаминиран воздух после распрскувањето на производот (сувиот шампон) укажуваат на можноста за краткотрајна и долготрајна изложеност на вдишување на високи нивоа на бензен. Посебно загрижува тоа што присуството на ова канцерогено соединение беше откриени во суви шампони кои редовно се користат во затворени простории и во големи количини“, се додава во наодот.
Независната лабораторија ја повикува американската Агенција за храна и лекови да побара повлекување на сите серии што го содржат отровниот бензен и подобро да ги дефинира границите на контаминација со бензен кај другите производи.
На Агенцијата обично и требаат 180 дена за да одговори на петицијата.
Минатата година неколку дезодоранси и производи за за заштита од сонце беа повлечени поради прекумерно ниво на бензен.
