Утре, во предворјето на Света Софија, во рамките на овогодишното „Охридско лето“ публиката ќе ја проследи култната драмска претстава „Жаба“ од Дубравко Михановиќ, а во режија на Елмир Јукиќ.
Претставата е во изведба на „Камерни Театар 55“ од Сараево, Босна и Херцеговина.
По тој повод, денеска беше организирана прес конференција на која говореа селекторот на драмската програма Зоран Љутков, актерите во претставата Мирсад Тука, Александар Сексан и Моамер Касумовиќ и директорот на „Камерни Театар 55”, Емир Хаџихафизбеговиќ.
Претставата е направена како интимна игра која донесува ликови кои не се снајдуваат во времето на транзицијата и времето на промените.
„Таа го дијагностицира времето во кое живееме. Проблемите и случувањата кои се исти, или слични, и во Босна и во Хрватска и во Србија, но и во другите краеви од поранешна Југославија. Постранзицискиот период со дисолуцијата на заедничката држава, бесмислата на срушениот систем на вредности, планетарната цивилизациска инверзија, цунамито на неолибералниот капитализам. Тоа е првенствено проблем на непостоење на комуникација и неможност да се слушне туѓото мислење, но и екстремната манипулација на луѓето од страна на властите“, рече на прес конференцијата директорот Хаџихафизбеговиќ.
Жанровски претставата му припаѓа на психо-реализмот. Специјално за „Камерни Театар 55”, ја напишал познатиот хрватски драматург Дубравко Михановиќ, кој пишува и сценарија за радио-телевизиски и документарни емисии и филмови.
Театарската претстава „Жаба“ во 2004 година е прогласена за најдобра за таа сезона во Хрватска, а Михановиќ за неа ја доби престижната награда „Марин Држиќ”, нему втора по ред после онаа за претставата „Бело”, во 1998.
„Жаба“ се игра веќе десетина години. Изведена е околу 250 пати во земјите на поранешна Југославија, како и во светот, бидејќи е преведена и на англиски јазик.
„Охридско лето 2017“ свеченото беше отворено во средата, во атрактивниот Антички театар, со членовите на реномираниот американски смут џез-квартет „Форплеј” во придружба на оркестарот на Македонската филхармонија и диригентот Емин Џијан,
Вчера, пак, на програмата беше балетска претстава „Ла, ла, ла”, во изведба на членовите на Македонската опера и балет.
