Германскиот правен експерт, Рајнхард Прибе денеска на свечена академија на Универзитетот ФОН, беше промовиран за почесен професор, титула како признание за компетентност и исклучиви дострели на домашни и меѓународни личности во доменот на повеќе општествени гранки, меѓу кои и правото и политиката.
Признанието му беше врачено во присуство на членови на дипломатскиот кор, министри, други познати личности и студенти, како и академик Владо Камбовски и ректорот на ФОН, Нано Ружин.
Во време на висока политичка криза во Македонија по објавувањето на бомбите, германскиот правен експерт ги скенираше аномалиите во македонскиот правен систем и изготви два извештаи за реформите во Македонија и неопходните промени на патот кон ЕУ и НАТО.
„Искрено бевме скептични дека ратификацијата ќе помине лесно, но видовме дека помина. Двајцата премиери покажаа храброст да го постигнат Договорот. Ова е неверојатен пример што можат да постигнат двајца премиери кога ќе ги надминат секојдневните реторики. Видовме како Договорот од Преспа веднаш ги отвори вратите за НАТО, но се плашам дека патот кон Европската Унија ќе биде подолг и поболен, изјави Прибе.
На барање на Европската Комисија, Прибе е во посета на Македонија, каде што изготвува извештај за напредокот на државата во реформите.
Проблематичното излегување на Велика Британија од Европската Унија, Прибе смета дека е лекција за земјите од Западен Балкан преку која можат да научат за бенефитите кои ги носи членството во Унијата. Но во моментов оценува дека и во ЕУ постојат проблеми.
Тој е избран за редовен професор од Меѓународниот универзитетски совет на Меѓународниот универзитет за мир на ОН – Европскиот центар за мир и развој со седиште во Белград, кој има свои активности во повеќе држави од регионот.
Тој држи предавања од областа на правото на Европската унија и е ментор на последипломски и докторски студии во повеќе единици на Европскиот центар за мир и развој, меѓу кои и во неговиот клон во Република Македонија. Бил во својство и на визитинг професор на наши универзитети.
Говорејќи за достигнувањата на Прибе во Македонија, професор Ружин потенцираше дека Прибе успеал да навлезе директно во менталитетот на одлучувачите во Македонија и дал одлична насока на каде треба да се движи државата.
