Годишнината од руската инвазија на Украина е можност за прослава, барем за руските власти, кои денеска подготвуваат голем хепенинг, поточно „концерт-митинг“ на московскиот стадион „Лужники“, пренесуваат медиумите на социјалните мрежи.
„Медуза“ на својот профил на Телеграм пишува дека целосното име на денешниот настан, како што пишува на билетот, е „Слава за бранителите на татковината“.
„На стадионот ‘Лужники’ се одржува ‘прославата’ на годишнината од почетокот на целосната инвазија и геноцид во Украина.
Многумина што ќе присуствуваат ќе бидат државни службеници кои се принудени да одат.
Сè уште не е познат точниот состав на уметници, но во медиумите се појавија имињата на Филип Киркоров, Клава Кока, Стас Михајлов, Полина Гагарин, Григори Лепс, Нилет, Олег Газманов, ШАМАН, Николај Башков и други“, пишува „Медуза“.
На социјалните мрежи има многу снимки од подготовките за денешниот настан на стадионот.
На влезот, наводно, темелно проверуваат според списоците, а потоа даваат ленти како ознаки.
Мобилизирани се студенти од Јарославје, Москва и Московскиот регион.Насекаде се видливи ознаки во форма на буквата „З“ (Z). Руските пропагандисти ја споменуваат бројката од 200.000 луѓе кои се очекуваат на стадионот.
„Новаја газета Европа“ со фотографија на својот Твитер профил пишува дека луѓето се собираат околу стадионот пред „митинг-концертот“.
„Волонтери на ‘Народен фронт’ одржуваат промоција за изработка на муниција, а на плоштадот е организирана и закуска.“
„Статистите за концертот се ангажирани за хонорар од 500 рубљи (приближно 6,70 долари), а на студентите им е ветено дека ќе бидат ослободени од часови“, пишува „Украинска Правда“.
Соопштено е дека на „митинг-концертот“ нема да можат да дојдат луѓе од улица.
Оние кои сакаат да влезат во „Лужњики“ мора да им достават лични податоци на организаторите.
Последен пат кога е одржан „митинг-концерт“ на којшто учествуваше и Путин, на овој стадион, беше на 18 март 2022 година, на годишнината од анексијата на Крим.
Рускиот медиум „Сота“ на својот Твитер профил пишува дека е речиси невозможно да се влезе доколку не сте на списокот: луѓето строго се проверуваат според списоците.
„На патот кон ‘Лужњики’ луѓето се поделени во групи според институции и работни колективи. На нивните гради им се ставаат значки во форма на руски знамиња“, објави „Сота“.
(Извор: „Данас“ / Фото: ЕПА-ЕФЕ / Максим Блинов)
