„Во 10 часот по локално време, денеска продолжува тридневната расправа во грчкиот Парламент за гласање доверба на новата влада, откако вчера свои обраќања имаа премиерот на Грција како и лидерите на сите грчки политички партии“, јави дописничката на МИА од Атина.
Вчерашната расправа започна во 19 часот со говор на Кирјакос Мицотакис, кој ја претстави владината програма, а расправата заврши на полноќ со обраќање на претседателот на МЕРА25, Јанис Варуфакис.
Опозициските партии рекоа дека нема да ѝ дадат доверба на владата и ги образложија нивните аргументи.
Говорите во големиот дел беа посветени на економијата, а не изостана и Договорот од Преспа, како дел од ставовите за грчката надворешна политика.
Во текот на денешниот и утрешниот ден се очекува збор да земат министрите од новата грчка влада, како и пратеници од сите партии.
Претставувањето на владината програма ќе заврши утре на полноќ со гласање доверба на владата, а на гласањето ќе му претходи говор на Мицотакис и на лидерите на партиите.
Владата ќе добие доверба доколку мнозинство од присутните пратеници гласаат „за“, мнозинство кое не смее да биде помало од две петтини од вкупниот број пратеници.
