Русија вчера објави дека подигнала два нејзини борбени авиони за да пресретне две американски беспилотни летала над Црното Море во близина на Крим.
„Кога беше откриен лет во правец на границата со руската држава, Москва испрати два борбени авиони за да спречат можно нарушување и да спречат мисијата на извидување на беспилотни летала“, објави руското Министерство за одбрана на Телеграм.
Американските дронови, од кои едниот бил „Репер“, а другиот „Голабал Хаук“ спроведувале извидување на полуостровот Крим, кој Русија го анектираше во 2014 година.
По доаѓањето на руските авиони, дроновите „го сменија правецот на летот и ја напуштија зоната за извидување“, додаваат од руското Министерство.
Инцидентите со пресретнување на руски авиони и американски беспилотни летала или авиони на НАТО зачестија во последните месеци над Црното море, но и над Балтикот, во контекст на војната во Украина.
Во неделата Русија тврдеше дека пресретнала американско беспилотно летало кое се приближувало до границата на Црното Море.
Сличен инцидент се случи и на почетокот на август.
Полуостровот Крим, клучен за логистиката на руските сили кои се борат на југот на Украина, постојано е цел на напади со украински беспилотни летала од почетокот на конфликтот.
Вчера САД ја обвинија Москва дека се обидува да ги заплаши и малтретира американските вработени откако руските државни медиуми објавија дека безбедносните служби обвиниле поранешен вработен во американскиот конзулат за собирање информации за војната во Украина и други прашања.
Руската државна агенција ТАСС ја цитираше безбедносната служба ФСБ дека Роберт Шонов, руски државјанин, им пренесувал информации на вработени во американската амбасада во Москва за тоа како регрутирањето во Русија влијае на политичкото незадоволство пред претседателските избори во Русија во 2024 година.
ФСБ соопшти дека планира да ги испраша вработените во американската амбасада кои биле во контакт со Шонов, кој е во затвор од мај, а кој повеќе од 25 години бил вработен во генералниот конзулат на САД во рускиот град Владивосток.
Портпаролот на Стејт департментот, Метју Милер, го повтори американскиот став дека обвинувањата против Шонов се „целосно неосновани“. Тие обвинувањата, рече Милер, „само уште повеќе ги нагласуваат сè порепресивните дејствија на руската влада против сопствените граѓани“.
„Силно протестираме против обидите на руската служба за безбедност, кои ги пренесуваат руските медиуми под контрола на државата, да ги заплаши и вознемирува нашите вработени“, додаде Милер.
Руската амбасада во Вашингтон не одговори веднаш на барањето за коментар.
