Минатата година, кога густината на сообраќајот после пандемијата се врати на претходните нивоа, во сообраќајни несреќи загинаа околу 20.600 луѓе, 3 отсто повеќе отколку во 2021 година.
Меѓутоа, ова е за 2.000 смртни случаи помалку (10 отсто) во споредба со предпандемиската 2019 година.
Станува збор за привремени податоци за 2022 година, а конечните податоци ќе бидат објавени есента оваа година, па оттука овие привремени податоци ќе подлежат на мали измени.
Во многу земји е постигнат напредок во приближувањето до поставената цел на Евтопската унија и Обединетите нации за преполовување на бројот на смртни случаи до 2030 година.
Но, тој напредок е многу нерамномерен. Во Литванија и Полска бројот на смртни случаи е намален за повеќе од 30 отсто, во Данска за 23 отсто.
Од друга страна, во текот на последните три години бројот на смртни случаи на патиштата во земји како Ирска, Шпанија, Франција, Италија, Холандија и Шведска остана прилично стабилен или се зголеми.
Европската унија во 2018 година постави цел бројот на загинати на патиштата и тешко повредени да го намали за 50 отсто до 2030 година, а до 2050 година да се сведе на нула.
Вкупниот поредок, според стапките на смртни счучаи, не е значително променет од состојбата пред пандемијата, така што патиштата се уште се најбезбедни во Шведска (21 смртен случај на милион жители) и Данска (26 на милион), додека Романија (86 на милион жители) и Бугарија (78 на милион) забележа највисоки стапки во 2022 година.
Просекот на ЕУ беше 46 загинати на патиштата на милион жители.
Врз основа на достапните податоци од 2021 година (подетални податоци за 2022 година сè уште не се достапни) за цела ЕУ, 52 отсто од смртните случаи во патниот сообраќај се случиле на руралните патишта, 39 отсто во градски подрачја и 9 отсто на автопатите.
Три четвртини од загинатите на патиштата (78 проценти) се мажи.
Патниците во автомобилите (возачите, совозачите и другите патници) чинат 45 проценти од сите загинати на патиштата, пешаците 18 отсто, мотоциклистите 19, а велосипедистите 9 отсто од вкупниот број загинати.
Во градските средини, процентите значително се разликуваат и незаштитените учесници во сообраќајот (пешаци, велосипедисти и корисници на мотоцикли) прават нешто помалку од 70 проценти од вкупниот број на смртни случаи.
Поголемиот дел од загинатите на градските патишта се жртви на судири на автомобили и камиони, што ја нагласува потребата да се подобри заштитата на ранливите учесници во сообраќајот.
