По Србија и Хрватска, од вчера и Босна и Херцеговина се вклучи во трката за привлекување на инвестиција на „Фолксваген“ од 1,3 милијарди евра, откако многу земји од регионот веќе почнаа да ги истакнуваат своите шанси во новонастанатата ситуација околу турската офанзива во Сирија.
„Испративме писмо за интереси и сега чекаме, не се откажуваме“, изјавиле од кабинетот на премиерот на Федерацијата БиХ, Фадил Новалиќ, за „Дневни аваз“.
Според информациите на весникот, за изградба на нова фабрика на автомобилскиот гигант му биле понудени две локации, и двете на подрачјето околу Сараево.
„Ним им треба огромна површина, а такви нема којзнае колку. Едната е на местото каде што некогаш беше ТАС, а другата во општината Нови Град. Понудивме и некои погодности, услови на финансирање“, истакнуваат упатени во ова прашање, оценуваќи дека ниту Турција не е сто отсто „отпадната“.
Хрватските медиуми, исто така, пишуваат за посетата на германскиот министер за стопанство на Хрватска и за нејзиното влегување во битката за оваа инвестиција вредна повеќе од една милијарда евра.
Изгледите за тоа Хрватска да ја добие инвестицијата на „Фолксваген“ не беа големи ниту претходно, а не се ниту сега, ништо не се има сменето, се истакнува во текст објавен на „Пословни дневник“.
Иако хрватскиот министер за стопанство, Дарко Хорват, на својот германски колега Ппетер Алтмаер му искажа подготвеност Хрватска да прифати дел од производството кое „Фолксваген“ да го премести од Германија, мали се шансите такво нешто да се реализира, пишува весникот повикувајќи се на добро упатени извори.
По повод новата трка во регионот околу оваа германска компанија, се огласи и претседателот на Србија, Александар Вучиќ, се наведува во текстот.
„Ветив уште од самиот почеток дека ќе се бориме. Видовме дека некои земји ги зголемија нивните понуди за „Фолксваген“, а ние понудивме многу повеќе. Во готови пари не можеме да понудиме којзне колку многу, не затоа што немаме, туку затоа што имаме ограничување, но во се друго сме подготвени да дадеме и двојно повеќе од конкурентите“, изјавил Вучиќ.
Германскиот весник „Велт“ пишува дека проектот за изградба на фабрика на „Фолксваген“ во Турција зависи од понатамошниот развој на политичката ситуација во врска со турската офанзива во Сирија.
Весникот потсетува дека германската компанија ги замрзнала плановите за отварање фабрика во Турција откако турската војска ја почна воената интервенција во Сирија.
„Го следиме развојот на настаните. Плановите за Турција моментно се ставени на чекање. Не бараме активно алтернативни локации, но сепак…“, ја пренесува „Велт“ завчерашната изјава на шрфот за производство во „Фолксваген“, Андреас Тостман, и оценува дека, во зависност од понатамошниот политички развој, „Фолксваген“ си остава на себе отворени понатамошни можности.
