Соединетите Американски Држави и Русија денеска започнаа тешки разговори за кои Вашингтон се надева дека ќе резултираат со деескалација на ситуацијата на украинско-руската граница без исполнување на барањата на Москва.
Рускиот заменик-министер за надворешни работи, Сергеј Рјабков, викендов изјави дека е сосема можно преговорите да завршат по една средба, а очекувањата ги намали американскиот државен секретар, Антони Блинкен.
„Мислам дека во следната недела нема да видиме некој посебен напредок“, изјави Блинкен вчера за Си-Ен-Ен.
Разговорите започнаа денеска во седиштето на дипломатската мисија на САД во Женева.
Односите меѓу Москва и Вашингтон се на најниско ниво од крајот на Студената војна пред три децении. Преговорите потоа се префрлаат во Брисел и Виена.
Заменичката на Блинкен, Венди Шерман, на Твитер напиша дека „САД ќе ја слушаат загриженоста на Русија и ќе ја споделат својата“.
„Нема да има разговори за европската безбедност без присуство на другите сојузници“, додаде таа.
Русија распоредува војска на границата со Украина
Над 100.000 војници донесе Русија на границата со Украина. Киев и Вашингтон тврдат дека се подготвуваат за инвазија, осум години откако го анектираше полуостровот Крим, пренесува Ројтерс.
Русија ги отфрла овие тврдења и истакнува дека само одговара на агресивното и провокативно однесување на НАТО и Украина.
Минатиот месец Москва ги претстави своите барања до Западот, кои вклучуваат вето за натамошното проширување на НАТО на исток и прекин на неговите активности во земјите од Централна и Источна Европа кои му се приклучија по 1997 година.
Отфрлени голем дел од руските предлози
Соединетите Американски Држави и НАТО веднаш отфрлија голем дел од предлозите на Русија, предизвикувајќи загриженост за можноста за договор.
„Нема да правиме отстапки под притисок“, најави Рјабков, предводникот на руската делегација во швајцарскиот град.
Американскиот претседател Џо Бајден повеќе пати го предупреди својот руски колега Владимир Путин дека САД и европските сојузници ќе воведат санкции без преседан доколку Русија одлучи да ја нападне Украина.
