Во Европската унија проценија дека најновата мобилизација најавена во Русија ја покажува желбата на рускиот претседател Владимир Путин да продолжи со „ескалацијата“ на војната против Украина и дека тоа претставува „нов знак за распаѓање“.
Медиумите со загриженост ги посочуваат и неговите зборови дека оние кои и се закануваат на Русија со нуклеарно оружје можат да и вратат со истата мерка.
Веднаш после обраќањето на рускиот претседател Владимир Путин, во Европа скокнаа цените на гасот, нафтата и пченицата. Стравот дека конфликтот ќе трае по најавата за дополнителна мобилизација во Русија веднаш ја зголеми цената на гасот за повеќе од пет отсто, на 203 евра за мегават-час. Само еден ден порано, чинеше најниско од јули.
Се проценува дека ескалацијата на конфликтот поради најавата на Путин може да го доведе во опасност понатамошното снабдување со нафта и дополнително да го намали протокот на руски гас, особено преку гасоводите кои минуваат низ Украина. И цената на суровата нафта веднаш скокна, за два отсто, на 92 долари. Нагло се зголемија и сомнежите дека ќе дојде до застој на извозот на украинско жито преку Црното Море. Цената на пченицата на берзата скокна на 338 евра за тон.
Веднаш откако Путин ја заврши последната реченица, доларот и златото добија на вредност.Американската валута порасна најмногу во последните дваесет години.Расте стравот од верижни поскапувања, а со тоа и од поголем инфлаторен ризик и посилна рецесија.Говорот на Путин имаше економско, но и психолошко влијание врз цените.
Главните западни медиуми обраќањето на Путин го оценија како „заканувачки“, со заклучок дека од сето тоа најмногу штета ќе претрпат Русија и Европа, а корист ќе имаат САД и Кина.
Претседателот на Европскиот совет, Шарл Мишел, изјави дека ЕУ ќе остане непоколеблива во поддршката за Украина, откако рускиот претседател Владимир Путин нареди прва мобилизација во таа земја после Втората светска војна.
„Во оваа војна има само еден агресор – Русија и една нападната земја – Украина. Поддршката на ЕУ за Украина ќе остане непоколеблива“, напиша Мишел на „Твитер“ од состанокот на Генералното собрание на ОН во Њујорк.
(Фото: „Данас“)