Американскиот државен секретар Мајк Помпео и францускиот министер за надворешни, Жан-Ив Ле Дриан, на маргините на министерскиот состанок на Глобалната коалиција за пораз на Исламска држава, изразија поддршка за членство на Северна Македонија во ЕУ, соопшти викендов Стејт департментот.
Освен за напорите за траен пораз на ИД, тие разговарале и за важноста на НАТО, за континуираната трансатлантска соработка за одговор на заканите по заедничките безбедносни интереси и за важноста од пристапувањето во ЕУ на Северна Македонија и Албанија.
„Помпео и Ле Дриан разменија мислења за важноста од пристапувањето во ЕУ на Северна Македонија и Албанија, за поддршката на Украина и за одговорноста на Иран за тековните провокации“, се вели во соопштението од Стејт Департментот.
Државниот секратар ја искажал цврстата посветеност на Администрацијата во НАТО алијансата.
Коалицијата за пораз на Исламска држава беше формиарана во 2014 година и вклучува средби на таканаречената Мала група за Сирија, во која учествуваат Франција, Велика Британија, Германија, САД, Саудиска Арабија, Јордан и Египет.
Во заедничката изјава дадена веднаш по министерскиот состанок се укажа дека групата дава цврста поддршка за Геир Педерсен, специјален претстваник на Обединетите нации во Сирија, за имплементација на резолуцијата 2254 на Советот за безбедност на ОН за запирање на насилствата во оваа земја.
