Јужноамериканските земји во Амазонија одлучија вчера да основаат „сојуз“ против уништувањето на шумата на состанокот на самитот во Белем што, иако не беа поставени конкретни задачи, бразилскиот претседател Луис Инасио Лула да Силва сепак го нарече „пресвртница“.
Основањето на „Амазонскиот сојуз за борба против дефорестација“ беше договорено во заедничка изјава потпишана од Бразил, Боливија, Колумбија, Еквадор, Гвајана, Перу, Суринам и Венецуела.
Задачата на сојузот е „да промовира регионална соработка во борбата против уништувањето на шумите, за да не дојде Амазонија до точка од која нема враќање“.
Ако се достигне таа точка, Амазонија би испуштала повеќе јаглерод отколку што би апсорбирала, што би го зголемило затоплувањето на планетата.
Но, спротивно на очекувањата на еколошките организации за заштита на околината, оваа заедничка изјава објавена по првиот ден од дводневниот самит не содржи никаква заедничка цел да се стави крај на уништувањето на шумата, што Бразил вети дека ќе го направи до 2030 година.
Овој дебел документ од 113 точки дава опширни насоки за соработката на осумте земји-членки на Организацијата за договор за соработка на Амазон (АКТО) за промовирање на одржливиот развој во оваа огромна област која е дом за околу 10 проценти од светската биоразноликост.
„Ова е првиот чекор, но нема конкретна одлука, тоа е само листа на ветувања“, коментираше Марсио Астрини, шеф на Климатската опсерваторија, бразилска невладина организација.
„Додека секојдневно се рушат температурните рекорди, не е можно лидерите на земјите во Амазонија да не можат јасно да кажат во изјавата дека уништувањето на шумите мора да се сведе на нула“, предупреди тој.
Самитот започна истиот ден кога европската служба „Коперникус“ потврди дека јули беше досега најтоплиот месец на Земјата.
„Никогаш досега не постоела толку итна потреба за продолжување и проширување на нашата соработка“, рече бразилскиот претседател, Луис Инасио Лула да Силва, во говорот на отворањето на состанокот, порачувајќи дека ќе го оствари „новиот амазонски сон“.
Претходно, во текот на денот, тој најави дека самитот ќе биде „пресвртница“ во борбата со климатските промени.
Самитот во Белем е главната проба за климатската конференција на Обединетите нации, КОП30, која во 2025 година ќе се одржи во тој пристанишен град со 1,3 милиони жители, на северот на Бразил.
На самитот се поканети и земји кои не се членки на АКТО, како што е Франција, која во Јужна Америка ја има амазонската територија, Гвајана, а денеска ќе биде претставена од амбасадорката во Бразил, Брижит Колет.
„Што е можно поскоро мораме да престанеме да ги уништуваме шуми“, напиша вчера францускиот претседател, Емануел Макрон, на X (поранешен Твитер), повикувајќи на „заштита на биодиверзитетот во интерес на земјите богати со шуми, нивните жители и целиот свет.“
Лула, кој во јануари се врати на власт, вети дека до 2030 година ќе се справи со уништувањето на шумите, кое нагло се зголеми за време на мандатот на неговиот претходник, Жаир Болсонаро, екстремен десничар.
Самитот продолжува денеска со учество на земји кои не се членки на АКТО, како Франција, но и Германија и Норвешка, кои се главни финансиери на „Фонд за Амазонија“.
Поканети се и Индонезија и Република Конго, каде има големи површини под тропски шуми.
(Фото: Рикардо Стикерт / АФП)
