Скопје, 22 април 2020
Владата на Република Северна Македонија, согласно претходно
направените анализи на Министерството за финансии и Царинската
управа донесе уредба за времено и условено зголемување на акцизата
на горивата за три денари за време на вонредната состојба и седум месеци по истекот на вонредната состојба.
Оваа уредба е донесена за да се ублажуваат економските последици од
зголемените трошоци за справување со коронавирусот КОВИД-19
обезбедување средства за редовно сервисирање на буџетските потреби, а при нејзиното носење земени се предвид вонредната состојба, забраните и ограничувањата за движење на населението, економските состојби во државата и намалената потрошувачка на горива, како и драстично намалената малопродажна цена на горивата.
Сите средства од повисоката акциза за нафтените деривати, ќе одат
директно во буџетот и ќе се искористат за поддршка на стопанството,
социјалните мерки за поддршка на граѓаните и за поддршка на нашиот
здравствен систем.
Со оглед на тоа дека значителниот пад на цената на нафтата на светските берзи во овој период предизвикува значително намалување и на малопродажните цени на горивата во нашата земја, ова зголемување
нема да предизвика дополнителни финансиски импликации за граѓаните и стопанството.
Од почетокот на годинава, па до почетокот на месец април, малопродажната цена на горивата е намалена за околу 20 денари по литар.
Она што е особено важно е дека се работи за антикризна мерка и во случај на зголемување на цената на нафтата, акцизата ќе се намали или ќе се врати на претходното ниво.
Кризата со коронавирусот остава сериозни економски последици на глобално ниво, а не е поштедена ниту нашата земја и за нивно надминување потребни се сериозни финансиски средства и солидарност од сите.
СДСМ
