Можноста грчкото воено воздухопловство да помага во контролата на воздушниот простор (FIR) на Северна Македонија е еден од веројатните договори што ќе се разгледаат, според грчката телевизија Опен, како за време на посетата на Алексис Ципрас на Скопје така и за време на посетата на министерот за одбрана на Грција што,
според истите информации, би следувала по онаа на грчкиот премиер, јави дописничката на МИА од Атина.
Телевизијата Опен објави дека практично оваа соработка би значела дека доколку се наведе сомнителен случај со непозната авиотрага во воздушниот простор на Северна Македонија, тогаш „грчките воени авиони ќе бидат повикани од соседите да се доближат до непознатата трага и да проверат за што станува збор”.
Според телевизијата, станува збор за вообичаена практика меѓу земјите сојузници на НАТО, кога една држава ги нема неопходните средства, тогаш друга помага. Ваква практика постои за FIR на Албанија и Црна Гора, каде што помагаат Грција и Италија.
Како што веќе објави МИА, посетата на Алексис Ципрас на Скопје се планира за почетокот на следнот месец, а иако грчките медиуми го споменуваат 2 април како можен термин сепак, според информациите на дописничката на МИА од Атина, точниот датум сè уште не е одреден.
Самиот Ципрас, при обраќањето на економскиот форум во Делфи рече дека во Скопје ќе допатува со бизнис-делегација, но и министри од неговата влада.
Според Опен, неколку дена по посетата на Ципрас на Северна Македонија, во Скопје ќе пристигне министерот за одбрана на Грција, Евенгелос Апостолакис, за да се разгледаат можностите за билатерална одбранбена и воена соработка, како што се заеднички воени вежби, размена на студенти од воените академии и сл.
