Силен земјотрес со јачина од 5,7 степени според Рихтер беше регистриран кусо пред 6.30 часот утрово по локално време во морскиот дел јужно од грчкиот остров Крит, а засега не се пријавени некакви проблеми.
Според Геодинамичкиот институт, епицентарот бил во морската област седум километри југозападно од крајбрежниот град Гудура и на длабочина од 5 километри.
Заменикот префект на областа Јанис Андрулакис за државната телевизија ЕРТ рече дека земјотресот бил почувствуван во источниот дел на островот и се во исчекување да видат дали се предизвикани некакви проблеми, а цивилната заштита на конкретните регионални единици е во состојба на готовност.
Претседателот на Организацијата за антисеизмичко планирање и заштита на Грција (ОАСП) професорот Ефтимиос Лекас за ЕРТ посочи дека освен на Крит земјотресот бил почувствуван и на соседните острови Касос и Карпатос.
Сеизмологот Герасимос Пападопулос на социјалните мрежи коментираше дека веќе следат последователни потреси, од кои најголемиот досега е со магнитуда 3,8 степени, но и дека во претходните денови имаше земјотреси, а сеизмичката активност се развива на значително растојание од Крит и „ова ја намалува опасноста дури и ако се случи уште поголем земјотрес“.
На 2 мај 2020 година, земјотрес со јачина од 6,6 степени се случи малку појужно, но не предизвика значителни штети поради растојанието. Тогаш имаше и мало цунами кај Јерапетра и Касос, напиша сеизмологот.
