На Конгресот на Комунистичката партија, кинескиот претседател Си Џинпинг најави промени во структурата, работењето и потенцијалот на најголемата армија во светот.
Кинеската војска во последните десет години брзо ги подобри своите поморски сили и способностите за ракетни напади, се справи со корумпираните офицери, ги подобри командните активности и изгради бази во „поморското срце на Југоисточна Азија“.
На ред се предизвикувачки потези, а тоа се коренита промена во командата на армијата од два милиони луѓе.
Со ова Џинпинг има можност да го зајакне раководството на армијата и да ја модернизира.
Се очекува дека на партискиот конгрес, кој започна на 16 октомври и се одржува на секои пет години, ќе бидат назначи нови офицери кои ќе служат во шестчлената комисија на претседателот, заради тоа што четири члена ќе се пензионираат.
Ќе се пензионираат најверојатно потпретседателите на ова претседателско тело, двајца генерали многу блиски соработници на Џинпинг. И двајцата генерали имаат по 72 години.
Од новите офицери се очекува да ја интегрираат војската, што се смета за клучно за евентуален напад на Тајван. На исто мислење се и некои азиски и западни воени аташеа и аналитичари. Целта е да се исполни повеќегодишното барање на претседателот војската да може да се бори и да победи во војни.
Дипломатските предизвици растат, бидејќи модернизацијата на кинеската армија се соочува со веќе традиционалната американска стратешка доминација во Источна Азија. Експертите веруваат дека комисијата на Џинпинг ќе мора да изгради воена база во странство и да обезбеди пристап до морските пристаништа за својата флота. А, констатирано е и дека ќе мораат да се „позанимаваат“ со надворешниот притисок поради нуклеарното оружје.
Но, процесот на воена модернизација може да биде комплициран од бавниот економски раст.
Најголем недостаток на новите членови на претседателската комисија е што немаат борбено искуство, што не е случај со некои од нивните претходници. Двајцата генерали кои се очекува дека ќе се пензионираат, се последните двајца офицери кои се бореле во граничниот конфликт со Виетнам што следеше по кинеската инвазија во 1979 година и траеше до крајот на 80-тите.
Изборот на нови членови на комисијата ќе открие кои се воените приоритети на кинескиот претседател. Овој избор најверојатно ќе биде избалансиран со унапредување на политички комесари, бидејќи нивна постојана обврска е да обезбедат армијата да и служи на Комунистичката партија, а не на државата.
Комисијата соработува со Постојаниот комитет на Политбирото, а претседателот е на чело на двете тела.
Некои сметаат дека од Постојаниот комитет зависи одлуката дали да се изврши инвазија на Тајван, а не од комисијата.
Она што е најважно за Џинпинг е дека има лојални кадри.
Во Министерството за одбрана на САД (Пентагон) оценуваат дека нуклеарната сила на Кина се развива многу побрзо од очекуваното.
Се претпоставува дека бројот на нуклеарни боеви глави во следните пет години ќе се зголеми на 700, а дека тој број ќе биде 1.000 до 2030 година.
(Фото: Си-Ен-Ен)
