Владата на Словенија во заминување во текот на својот четиригодишен мандат преку посебни апликации примила повеќе од 2.600 законски предлози кои ги поднеле обичните граѓани, повеќе од 2.000 предлози се сериозно разгледани во надлежни министерства и служби, а позитивен резултат добиле вкупно 22 граѓански законодавни иницијативи.
На иницијатива на граѓаните укинати се некои такси за купување на возила за инвалидизирани лица, поедноставена е постапката за идентификација на сведоци во судовите и се заострени казните за оние кои ја кршат забраната за продажба на алкохол на малолетници и воведени се паркинг места за трудници и мајки со мали деца.
Меѓу предлозите кои стигнале преку апликацијата (predlagam.vladi.si) имало и необични иницијативи како што се идејата на јавните службеници да им се забрани користење на парфем на работното место, а на млекарите производство на индустриски кајмак.
Иницијативите биле разгледувани, но не биле прифатени, па во иднина словенечките јавни службеници кои контактираат со странките и понатаму ќе смеат да користат парфеми, а млекарите да прават „индустриски кајмак“, чија забрана ја бараа малите произведувачи.
Едните сметаат дека кајмакот мора да се прави по традиционален рецепт, додека другите, индустријалците, се со став дека е можно и производство според други методи.
Министерството за земјоделство им одговори на предлагачите дека тие нема да менуваат ништо, додавајќи дека дилемата со кајмакот ќе ја решава следната влада.
Што се однесува до правата на јавните службеници да користат парфем, владата на предлагачите им наведе дека забраната би била „тешко изводлива и непропорционална мерка“, но дека постои можност граѓаните на кои им прешат таквите мириси или на нив се алергични во надлежните канцеларии и служби да побараат „посебна обработка“ кај службеник кој не користи силен парфем и дезодоранс.
