Претседателот на Русија, Владимир Путин, и турскиот лидер, Реџеп Таип Ердоган, ќе разговараат денеска во Сочи за трговско-економските односи и регионалните проблеми – Сирија, Авганистан, Либија, како и за други прашања.

Турскиот политиколог Мехмет Перинчек укажува на значењето на заедничката акција на Русија и Турција по прашањето за состојбата во Идлиб и на целиот Блиски Исток во моментите на намалувањето на присуството на Соединетите Американски Држави во источниот медитеран и на евроазискиот простор.

„Состанокот на Путин и Ердоган во светлото на поразот на САД, меѓу останатото во Авганистан, добива на уште поголемо значење. Гледаме дека Американците го губат претходното влијание, додека регионалните играчи добиваат на значење. Во овој период Русија и Турција играат посебно важна улога. Се разбира, во турско-руските односи постојат прашања кои араат решение, и паралелно со тое тие треба да донесат одлуки за заеднички акции во рамки на единствена стратегија за осигурување на единството на регионалните држави, нивната економска благосостојба, националната безбедност“, смета експертот.

Тој смета дека главна тема на престојниот состанок ќе биде Сирија. Подрачјето на Идлиб и територијата источно од Еуфрат ќе се разгледува како единствен фронт, во чии граници би требало да се покрене процес за ликвидација на терористичките елементи.

„Турција и Русија постигнаа договор за Сирија во текот на астанскиот процес, чиј најважен принцип е осигурувањето на територијалната целовитост на Сирија. Радикалните терористички групи во Идлиб и сепаратистичките терористички организации источно од Еуфрат се борат и против Турција и против Русија, додека зад нив стојат Соединетите Американски држави. Без елиминирање на радикалните терористички групи не може да се заврши сепаратистичкиот тероризам, и обратно. Москва и Анкара треба тоа јасно да го знаат“, рече Перинчек.

Политичкиот аналитичар, новинарот Џејхун Боскурт се сложува со Перинчек кога станува збор за клучните теми за кои ќе се разговара на претстојниот состанок во Сочи.

„Очигледно е дека ќе се разговара за прашања како што е состојбата во Идлиб, активностите на курдските формации во Сирија, состојбата во источниот Медитеран, Либија, Крим, состојбата на Јужен Кавказ, соработката во сферата на одбранбената индустрија…“, истакнува Боскурт. Тој, исто така, потсети дека „во последно време растат тензиите околу Идлиб“.

„Воздушните напади на руските воени сили на територијата јужно од автопатот М4, Турција ги доживува како напад на присуството на нејзините Вооружени сили во регионот, што многу ја загрижува Анкара. Покрај тоа, присуството на курдската партија Демократски сојуз (прогласена во Турција за терористичка) во Сирија претставува закана како за територијалниот интегритет на Сирија, така и за безбедноста на турската граница. Двете земји би требало да се фокусираат на решавање на тие две прашања со одржување на индиректни контакти со официјален Дамаск“, смета експертот.

Покрај тоа, истакнува Боскурт, во последно време се дадени „прилично остри изјави на тема – Крим, а исто така се забележливи несогласувања по прашањето за Кипар“.

„Барањето допирни точки за тие теми би требало да биде насочено на тоа Русија и Турција да се изборат со западното повлекување. Во актуелните околности, односите меѓу Турција и Русија би требало да бидат ориентирани на долгорочни цели и трансформирани во стратешка соработка, што одговара на интересите на двете држави. Јакнењето на односите е засновано на одредена основна спогодба меѓу Анкара и Москва во поглед на најосетливите точки. Ако таа биде реализирана, Турција и Русија ќе бидат меѓу водечките сили кои ја одредуваат глобалната политика на евроазискиот простор“, заклучи Боскурт.

(Фото: АП)