Министерот за внатрешни работи на Македонија, Оливер Спасовски, смета дека има можност да се отвори постапка за проверка на финансиските текови околу продажбата на ТЦ „Соравија“, со која како што беше објавено вчера, со 39 проценти удел ќе се стекне Дрин Ахмети.
„Ова се податоци и информации коишто даваат можност да се отвори постапка за проверка, пред се на финансиските текови. Јавното обвинителство може да отвори истрага и на основа на тоа да задолжи соодветни институции за спроведување на законот за да се проверат сите факти и аргументи“, изјави Спасовски, на новинарско прашање дали МВР ќе провери како Дрин Ахмети се стекнал со 39 проценти од трговскиот центар.
Спасовски во коментар за најавениот собир во организација на МПЦ-ОА во знак на протест од предложениот закон за родова еднаквост, посочи дека законот се уште не е влезен во владина процедура и оти треба да се отвори широк дијалог.
„Сметам дека треба да се отвори широк дијалог во однос на овој закон, и на крајот да ги постигнеме очекувањата на општеството. Кога ќе се затвори целосната дебата, тогаш законското решение може да оди во владина и во собраниска процедура“, рече Спасовски.
