Кинеската војска денеска соопшти дека забележала и придружувала американски брод – разурнувач, кој илегално влегол во водите околу островите Парасел во Јужното Кинеско Море.
Во соопштението, војската вели дека бродот со наведувани проектили УСС Милиус навлегол во територијалните води на Кина, нарушувајќи ги притоа мирот и стабилноста на прометниот воден пат.
„Нашите сили ќе бидат во состојба на висок степен на готовност и ќе ги преземат сите неопходни мерки за одлучно да го заштитат нашиот суверенитет и безбедност и стабилност во Јужното Кинеско Море“, изјави Тијан Џунли, портпарол на јужната команда на Кина.
Американската морнарица ја оспори изјавата на кинеската војска, велејќи дека разурнувачот спроведувал „рутински операции“ во Јужното Кинеско Море и дека не бил избркан.
„Соединетите Американски Држави ќе продолжат да летаат, пловат и оперираат секаде каде што дозволува меѓународното право“, се вели во соопштението на Седмата флота на американската морнарица.
Тензиите меѓу САД и Кина се зголемија во тоа подрачје.
Америка ги зајакнува сојузите во азиско-пацифичкиот регион со цел да се спротивстават на кинеската самоувереност во Јужното Кинеско Море и Тајванскиот теснец додека Пекинг се обидува да напредува во своите територијални тежнеења.
(Фото: Илустрација / АФП / Лејла Горчев)
