Девет фестивали на електронска музика во пет хрватски жупании ги зафати летово оперативната акција „ПЕРЕДУР 2023“.
Бројките поврзани со запленетите дроги и пари кои потекнуваат од шверцот со наркотиците, како и бројот на апсења, притворања и пријави, се импресивни, информираат медиумите во Хрватска.
Хрватското Министерство за внатрешни работи соопшти дека во акцијата учествувале полициски службеници од криминалистичката и униформираната (интервентна) полиција од повеќе управи, во соработка со специјализирани припадници на органите на прогонот на Велика Британија и Националната криминалистичка агенција и припадници на Федералната криминалистичка полиција на Германија.
Врз основа на анализа и проценка на ризик, акцијата се спроведувала од 23 јуни до 25 август годинава на вкупно девет музички фестивали на електронска музика, кои се одржаа на подрачјето на Задар, Карловац, Сплит, Шибеник и Книн.
Целта на оперативната акција е заштита на животите и имотот и состојбата на општата безбедност во Хрватска за време на туристичката сезона преку превенција, откривање и гонење на кривични дела и прекршоци првенствено поврзани со шверц и трговија со дрога.
Полицијата својата оперативна работа ја насочила приоритетно кон откривање на препродавачи на дрога (дилери), како и спречување на формирање на привремен нарко пазар на музичките фестивали, како и обезбедување сигурност на места каде што се собираат голем број луѓе (на пример, на УЛТРА во Сплит имало над 30.000 посетители дневно), клони кон трошење за стимуланси или халуциногени дроги.
Соработката на хрватските со британските полицајци се покажала како клучна, имајќи го предвид нивното искуство од следење на вакви фестивали низ Британија, и тоа дека многу голем број посетители се од островот.
Во текот на акцијата идентификувани се и кривично гонети членови на криминална група – бандата наречена „Скаусери“ од Ливерпул, која во моментов е една од подоминантните улични банди во Британија.
Според официјални податоци, во првите седум месеци во Хрватска се остварени над 11,5 милиони пристигнувања и речиси 57 милиони ноќевања, што споредено со истиот период лани претставува раст од 10 отсто на пристигнувања и 4 отсто на ноќевања.
„Во овие околности, беше и очекувано и потребно систематско оперативно дејствување на полициските сили на фестивалите за електронска музика, каде што вообичаено се собираат домашни и странски гости кои конзумираат дрога и го нарушуваат јавниот ред и мир, а како резултат на тоа може да дојде до загрозување на општата состојба на безбедност на граѓаните и нивниот имот. Забележано е дека ваквите собири ги следат и членови на криминалното милје кои, организирано, препродаваат дрога на посетителите“, истакнуваат од хрватската полиција.
Во акција поднесени се вкупно 47 кривични пријави, изготвени 54 обвинителни акти, а издадени се 467 прекршочни пријави со парични казни, врз основа на кои се наплатени околу 224.000 евра.
Пријавени се вкупно 69 хрватски и 424 странски државјани од повеќе од 30 земји (кривични и прекршочни пријави).
При спроведување на акцијата, полицајците одзеле 126.869 евра, 6.940 британски фунти и 573 американски долари (вкупно околу 135.500 евра).
Запленети се и 9,4 килограми марихуана, 882 грама хашиш, 16.309 таблети – екстази, 990 грама МДМА, 2,3 килограми кокаин, 284 грама амфетамин, 112 дози ЛСД и 329 грама печурки Псилоцибин.
(Фото: Кропикс / МВР на Хрватска)
