Четири лица загинаа кога мал спортски авион се урна вчера попладне во Лунгау, во централна Австрија, објави денеска австриската полиција, додавајќи дека авионот летал од Загреб за Салцбург.
Авионот „Сирус СР-20“ полетал од главниот град на Хрватска нешто пред 14 часот, а крајната дестинација му била аеродромот во Салцбург.
Околу 15:45 часот леталото се урна во шума на непрооден терен во областа Пасеген.
Службите за итни случаи успеале да стигнат до остатоците од авионот кога патниците веќе биле мртви. Според информациите од полицијата, жртвите се уште не се идентификувани.
Причините за несреќата до овој момент не се познати.
Државната канцеларија на криминалистичката полиција во Салцбург ја презеде истрагата и повика експерт за воздушни несреќи.
Државниот правобранител наредил детална проверка на остатоците од авионот и обдукција на телата на починатите, јави АПА.
Спасувањето било отежнато поради постојаниот дожд и стрмниот терен.
Во текот на ноќта припадници на доброволната противпожарна единица и членови на планинската спасувачка служба го извлекле трупот од авионот го транспортирале во просториите на Одделот за одржување на патиштата заради правење стручна експертиза.
Според „Кроненцајтунг“, очевидец го слушнал ударот и ги алармирал спасувачките служби. Како што информира „ОРФ Салцбург“, времето во Лунгау во моментот на несреќата се сметало за тешко за летови – поради делумно густата облачност и турбуленциите на ветерот. Покрај тоа, се наведува и дека паднатиот авион стандардно бил опремен со падобран за итни случаи, кој се активира со помош на експлозивно полнење. Меѓутоа, системот за спасување очигледно не бил активиран, пренесува агенцијата АПА.
