Најмалку осум лица загинаа, а 84 се повредени во експлозија на нафтен терминал во главниот град на Гвинеја, Конакри, рано утринава, изјави висок полициски претставник.
Според неговите зборови, пожарот е под контрола, но бројот на жртви може да се зголеми.
Експлозија на единствениот нафтен терминал на таа западноафриканска држава го потресе административниот округ Калуум во центарот на Конакри, разнесувајќи ги прозорците на неколку околни куќи и принудувајќи стотици луѓе да ја напуштат таа област, наведува сведок за Ројтерс.
Огромниот оган и црниот чад кој се издигнува над платформата можеа да се видат со километри далеку додека пожарникарите брзаа кон тоа подрачје, а неколку камиони-цистерни го напуштија магацинот, придружувани од војници и полицајци.
Портпаролот на владата на Гвинеја не одговори веднаш на барањето за коментар.
