Поранешниот американски претседател Доналд Трамп одржа собир во Аризона. За време на митингот, прв оваа година, Трамп ја повтори старата „песна“ – дека победил на изборите и дека демократите сакаат да направат комунистичка држава од САД. Неговиот говор беше поздравен од илјадници насобрани поддржувачи.
„Готово е со тоа политичарите во Вашингтон да ги контролираат вашите животи. Наметнувањето заврши“, рече Трамп.
„Радикалните демократи сакаат да ги претворат САД во комунистичка земја“, додаде тој.
Повтори дека претседателските избори во 2020 година биле наместени, дека демократите ги украле гласовите и дека тој е вистинскиот победник и рече: „Не, не можеме и не смееме да дозволиме да се извлечат од тоа!“
„Тука владее одлична атмосфера, ова е вистинска забава“, изјавил за Франс прес еден од насобраните.
„Дојдовме да му дадеме поддршка на нашиот претседател. Сакаме да ја направиме Америка повторно голема. Патриотите низ целата земја се собраа за општото добро на земјата. Ние го сакаме нашиот претседател“, додал тој.
Извесна Џенифер Винтербауер, која, вели, била меѓу првите што дошле на митингот, рече дека е таму за да ја слушне „вистината“ од Трамп.
„Тој секогаш ја кажува вистината, за сè. За економијата, за ситуацијата во светот, за САД“, додаде таа.
Митингот во Аризона е првиот митинг на Трамп од октомври. Во пресрет на неговата победа на изборите во 2016 година и за време на неговиот претседателски мандат, на неговите митинзи се собираа десетици илјади луѓе, но во последно време неговите митинзи се сè помалку посетени.
„Франс прес“ наведува дека на саботниот собир имало помалку луѓе од вообичаено. Трамп, кому му е забрането да го користи Твитер, неговата главна платформа за обраќање до јавноста, е многу помалку вклучен во американската политика после поразот на изборите.
Сепак, тој е влијателен во Републиканската партија и, според АФП, поддршката на неговите теории, или барем неоградувањето од нив, често е неопходно за опстанокот на републиканските конгресмени и другите функционери.
Трамп ретко се појавуваше во главните медиуми откако не е претседател, но минатата недела даде интервју за Националното јавно радио (НПР) во кое ги повика луѓето да се вакцинираат против короната, што предизвика жестоки критики од дел од неговите поддржувачи.
(Фото: АП)
