Најмалку десет работници, меѓу нив петмина странски државјани, загинаа, додека 35 се повредени во воздушниот напад на фабриката за кекси во Триполи, главниот град на Либија, соопшти претставникот на Обединетите нации за Либија, Гашан Салан.
Тој тоа го соопшти на седницата на Советот за безбедност и додаде дека најверојатно се работи за воено злосторство, пренесе Ројтерс.
Според неговите зборови, повеќето убиени се мигранти, додека две жртви се либиски државјани.
„Без оглед на тоа дали во нападот намерно е стрелано на фабриката или беше неселективен напад, тоа може да биде воено злосторство“, рече Салам и ја обвини Либиската народна армија дека предизвика цивилни жртви и додаде дека таа војска раководела со повеќе од 800 напади со дронови.
Од друга страна, рече тој, владата во Триполи изведе околу 240 напади.
Министерството за здравство издаде соопштение во кое се вели дека нападот се случи во квартот Вади ел-Рабие во јужниот дел од градот, на околу 20 километри од центарот.
Триполи од април годинава е средиште на борби меѓу самопрогласената Либиска народна армија и повеќе милиции поврзани со меѓународно признатата, но слаба влада, која ја контролира престолнината.
Уличните борби престанаа во изминативе недели, но двете страни продолжија да разменуваат минофрлачки напади на јужните делови од градот.
Во борбите загинаа стотици луѓе, а илјадници се раселени.
