Премиерот Зоран Заев денеска прими делегација на компанијата „Мајкрософт“ што ја предводеше Филип Рог, претседател на компанијата за централна и источна Европа.
На средбата било разговарано за финиширање на подготовките што треба да се преточат во договор за соработка на Владата со „Мајкрософт“, кои беа започнати во Давос оваа година.
„Во разговорот беше истакнато дека воведувањето модерна и технолошки напредна инфраструктура со соодветно обучена администрација и пријателски дигитални услуги се предност кога станува збор за привлекување директни странски инвестиции, како и за приватните компании во земјата, на кои ќе им бидат максимално олеснети комуникацијата и извршувањето на работите на инвеститорите преку дигитализираните процедури“, соопштија од Владата.
Посебно внимание на средбата било посветено на темата за сајбер-безбедноста и на можностите што „Мајкрософт“ може да ги понуди на овој план за да се обезбедат владините комуникации и за да се реагира на сајбер-нападите бргу, одговорно и ефикасно, како и за потребата од компатибилност на безбедносните системи и протоколи со оние на НАТО и на ЕУ.
Претставниците на „Мајкрософт“ потенцирале дека тие се запознаени и со внимание ја следат имплементацијата на владините програми за поддршка на ИТ-компаниите и секторот и дека се подготвени да земат учество во поддршка на стартап-компаниите и акацелераторите во бизнисот со информатичка технологија.
