Четиринаесетта година по ред Фондацијата „Трајче Мукаетов“ додели стипендии за студенти на Фармацевтскиот и на Медицинскиот факултет при Универзитетот „Св. Кирил и Методиј“ од Скопје.
Годинава се доделени 40 нови стипендии, од нив 20 за студенти на Фармацевтскиот и 20 за студенти на Медицинскиот факултет.
Еднократната парична награда во висина од 1.200 евра во денарска противвредност, која ја доделува Фондацијата дванаесетта години по ред, за првенците на генерација на двата факултета, годинава им припадна на Зоран Гаврилов од Фармација (со просек 9,49) ….
… и на Милена Гривчевска од Медицина (со просек 9,94), двајцата стипендисти на Фондацијата „Трајче Мукаетов“.
„Особено ми е драго што компанијата ‘Алкалоид’ и Фондацијата ‘Трајче Мукаетов’ биле и се дел од успешната приказна на 579 студенти по фармација и по медицина на државните универзитети во изминативе 14 години. Едукацијата во овие две професии е од исклучителна важност, а задоволството е уште поголемо што ние како компанија ги стимулираме студентите во текот на образовниот процес и ги мотивираме кон нови повисоки достигнувања во матичните струки. Од вкупниот број стипендирани студенти досега, 92 веќе ја започнаа својата кариера во нашата компанија. Иако приликите на новото време налагаат специфично функционирање на процесите во сите сфери, нашите заложби за инвестирање во образовниот процес, во знаењето и во луѓето, пред сѐ, ќе останат на врвот на листата на приоритети на компанијата“, изјави Живко Мукаетов, претседател на Фондацијата „Трајче Мукаетов“ и генерален директор на „Алкалоид“ АД Скопје“.
Почнувајќи од учебната 2007/2008 година, досега Фондацијата стипендираше вкупно 579 студенти по фармација и по медицина, вклучувајќи ги и новите 40 во новава учебна година. Од нив 218 студенти по фармација и 211 по медицина се веќе дипломирани.
Од 2009 година до денес својата кариера во „Алкалоид“, во одделите на сегментот „фармација“, ја започнале 92 од стипендираните студенти, од нив 85 студенти од Фармацевтскиот и седум студенти од Медицинскиот факултет.
Стипендијата изнесува 6.500 денари во текот на 12 месеци, а заклучно со 30 октомври оваа година преку Фондацијата „Трајче Мукаетов“ е исплатен износ од 109.975.568 денари по основ на стипендии и на еднократни парични награди за првенците на генерација.
