Вчера Франција и официјално го премина мрачниот број од сто илјади починати од Ковид.
Дневниот весник „Монд“, по примерот на американските колеги, по тој повод на насловната страна стави црни точки, а секоја од нив визуено претставува еден човечки живот.
За една година, пишува весникот, исчезнал, практично, еден цел град.
Зад овие бројки се човечки животи, а зад нив цели семејства и тага која го прати нивното заминување. Починати се стари, но и средовечни и млади луѓе. Официјалните статистичари сметаат дека починати има уште повеќе, затоа што недостасуваат податоци за оние кои починале дома, а не во болница, како и оние кои ќе се ажурираат, па се смета дека дека овој број ќе биде зголемен за уште околу 11 илјади.
На тоа треба да се придодадат и оние за кои не е утврдена директна врска со оваа болест, но која ја забрзала нивната смрт.
Имало толку починати што, практично, многумина отидоа во заборав. Морбидните бројки станаа секојдневица, а луѓето како да се навикнаа на ова непрестано лицитирање, од ден на ден.
Здруженијата на семејствата на починатите од Ковид затоа бараат во земјата да се одржи ден на сеќавање на нив, но властите сеуште не одлучиле кога тоа ќе го направат.
„Тој момент ќе дојде“, рече портпаролот на владата Габриел Атал, пренесе „Монд“.
Познавачите на приликите велат дека Франција ќе им одаде почит на настраданите кога конечно ќе се запре бројчаникот на смртта од корона.
Некои, како Сабрина Селами, претседателка на едно од здруженијата на настраданите, која ги загубила и братот и таткото, бара извинување од владата за сите грешки кои ги направиле до сега во справувањето со пандемијата, како што тоа го направил британскиот премиер Џонсон.
Црниот биланс во Франција и понатаму не е потсмирен. Дневно умираат по неколку стотици луѓе, а новиот бран уште не го достигнал врвот.
До сега осум земји во светот ја надминаа бројката од сто илјади починати. На прво место се Соединетите Американски Држави со 564.000, а следат Бразил (358.000), Мексико (210.000), Индија (172.000), Велика Британија (127.000), Италија (115.000), Русија (102.000) и Франција (100.000).
Во светот до сега од корона вирусот починаа околу три милиони луѓе. Поточно, според податоците од вчера, 2.988.133 лица.