Фудбалската репрезентација на Франција е првиот полуфиналист на Светското првенство во Русија, откако денеска во Нижњи Новгород го победи Уругвај со 2:0.
Головите за Франција ги постигнаа Рафаел Варан во 40 и Антоан Гризман во 61 минута.
Франција во полуфиналето на шампионатот на светот ќе игра против победникот од вечерашното четвртфинале во кое ќе се состанат Бразил и Белгија.
Франција беше подобра во првото полувреме, но мораше многу да работи за да ја пробие одбраната на Уругвај.
На „триколорите“ тоа им појде од рака во 40 минута кога Варан со глава ја погоди мрежата на Фернандо Муслер после центаршутот на Гризман.
Само четири минути подоцна Уругвај можеше да изедначи, но ударот на Мартин Касерес со лава го запре Уго Лорис. Тоа воедно беше и најдобрата шанса на Уругвај на целиот натпревар.
Франција во 61 минута ја зголеми предноста, а стрелец беше Гризман после големата грешка на Муслер.
Гризман шутираше по средината на голот од над 20 метри, топката одеше директно во Муслера, тој несмасно интервенираше и наместо в поле ја прати зад себе, во голот.
Уругјалците, кои на овој натпревар играа без повредениот Едисон Кавани, во финишот на мечот се обидоа да ја направат средбата интересна, но не успеаја посериозно да го загрозат голот на Лорис.
