Околу 3.305 „топли банки“ се отворени ширум Велика Британија, затоа што милиони луѓе се соочуваат со изгледите за сиромаштија оваа зима. Временската прогноза не им оди во прилог на сиромашните Британци – се предвидува дека, во текот на следната недела, температурите би можеле да паднат до -10 степени Целзиусови.
Во организација на коалиција на христијански групи, во Британија се спроведува „Кампања за топло добредојде“ – црквите, библиотеките, општините или фирмите, ги отвораат вратите за оние кои очајно сакаат да се загреат – тие се претвораат во „топли банки“.
Некаде, овие простории нудат и бесплатен чај или простор за работа, а според пишувањата на медиумите, третина или дури половина од овие простори од саботата се веќе полни.
„Нема сомнеж дека се движиме кон врвот на кризата предизвикана од зголемувањето на трошоците за живот и енергенси. Многумина ќе бидат принудени да избираат помеѓу храната и греењето. Создавањето топли и пријатни простори ќе биде неопходно“, рече еден од активистите на кампањата, свештеникот Карл Бич.
Според „Коалицијата за борба против сиромаштијата“, 16,4 милиони Британци нема да можат да си дозволат греење оваа зима. „Кампањата за топло добредојде“ предвидува дека секој десетти смртен случај оваа зима ќе биде предизвикан од сиромаштија, додека владината помош останува на 800 фунти и не се менува и покрај растот на животните трошоци.
Во меѓувреме, Британија се соочува со ледени денови, кои, според прогнозите, ќе траат и следната недела, што ќе предизвика во „топлите банки“ да дојдат уште повеќе корисници.
