Велика Британија почна многу да се задолжува поради покачените цени на енергијата и зголемената инфлација.
Во октомври, земјата нето позајми 13,5 милијарди фунти, во споредба со 9,2 милијарди фунти во истиот месец лани.
Така, јавниот долг на земјата минатиот месец порасна на речиси 2.460 милијарди евра, или 97,5 отсто од бруто домашниот производ (БДП).
Аналитичарите оценуваат дека високото задолжување во октомври е резултат на владините мерки за заштита на домаќинствата од високите цени на енергенсите.
Властите есенва воведоа двегодишно ограничување на цените на струјата и гасот за домаќинствата, а потоа шестмесечно ограничување за компаниите, јавните институции и невладините организации.
На тој чекор се одлучија поради неконтролираната инфлација, посебно заради високите трошоци за енергија.
„Точно е дека земјата го зголеми своето задолжување за поддршка на милиони бизниси и семејства“, ги коментираше бројките новиот британски министер за финансии, Џереми Хант.
„Но, за да одговориме на предизвикот на инфлацијата поттикната од вртоглавото зголемување на сметките за струја, од клучно значење е јавните финансии да се стават на поодржлив пат“, додаде.
Хант минатата недела го претстави буџетскиот план, чија цел е да се доведат бројките во ред и да се скроти растечката инфлација.
Планот вклучува 55 милијарди фунти зголемување на износот на даночните олеснувања за граѓаните и зголемување на данокот на неочекуваните добивки од енергетската индустрија. Министерот тогаш објасни дека Велика Британија е во рецесија. Британската економија следната година ќе се намали за 1,4 отсто, а невработеноста ќе се зголеми од сегашните 3,6 отсто на 4,9 отсто до 2024 година, рече тој.
