Заменик-помошникот државен секретар на САД Хојт Ји, во интервју за ТВ Алсат М, изјави дека многу е важно да се утврди одговорноста за нелегалното прислушување и за наводните владини злоупотреби во врска со прислушувањето.
„Тоа ќе биде клучен чекор за Македонија да ги увери НАТО, ЕУ и другите меѓународни партнери дека е подготвена да се интегрира во тие организации, нагласи Ји.
„Тоа е важно и за граѓаните на земјата да се уверат дека е воспоставено владеење на правото. Ги повикуваме сите политички партии, политички и владини лидери, членовите на Парламентот, да сторат сѐ што можат да биде спроведена правдата, СЈО да ја добие потребната поддршка за да си ја заврши работата и да нема политички притисок врз обвинителите и судиите од инволвираните во утврдување на одговорноста. Тоа треба да се направи во разумен рок и да не се одолговлекува – истакна Хојт Ји.
Клучно за иднината на Македонија, според него, е да се направат потребните судски реформи, кои ќе овозможат судството да стане независно, слободно од политички притисок, за да може да носи брзи и навремени одлуки, со што ќе се овозможи силно владеење на правото.
„Тоа е важно за граѓаните, за интеграцијата во НАТО и ЕУ, но и за привлекување странски инвеститори, рече Ји.
За релациите власт- опозиција, Ји рече дека секоја демократија има потреба од силна влада, но и од силна опозиција, која нема само да блокира предлози со кои не се согласува, туку и ќе нуди алтернативи. Македонија, не може да си дозволи луксуз на постојани одлагања и опструкции од партиите вели ЈИ.
„Демократско право е да се користат сите законски алатки што се во согласност со парламентарните правила. Но обврската за одговорна, конструктивна опозиција значи не само блокирање предлози туку и нудење алтернативи.
„Затоа, се надеваме дека ВМРО и другите парламентарни партии ќе бидат конструктивни, дека ќе бараат компромиси кога има несогласувања. Одблиску ќе набљудуваме, исто како и ЕУ. Ќе ги сметаме за одговорни оние партии или поединци што опструираат само заради опструкција или заради лични и други намери нагласи Хојт Ји.
Заменик-помошникот државен секретар на САД се осврна и на влијанието на Русија во регионот на Западен Балкан. Смета дека Македонија треба да се спротивстави на руското влијание и на дезинформациите што пристигнуваат од Москва.
„Гледаме дека Русија се обидува да ја обесхрабри интеграцијата на земјите од Западен Балкан во НАТО и ЕУ.
„Важно е Македонија да работи со нас, со ЕУ и со партнерите во регионот, да продолжи да се противи на малигните влијанија од кој било извор што ќе дојде, да продолжи да ја јакне независноста на медиумите, важно е да има силни, професионални, независни медиуми што ќе се спротивстават на дезинформациите од Русија или други извори, рече Хојт Ји.
