Француските синдикати започнаа денеска национален штрајк барајќи повисоки плати во екот на децениски не запаметена толку висока инфлација, еден од најтешките предизвици на претседателот Емануел Макрон после неговиот повторен избор во мај.
Штрајкот, кој најпрво ќе ги погоди јавните сектори како што се училиштата и транспортот, е продолжување на повеќенеделниот штрајк кој ја наруши работата на големите рафинерии и снабдувањето со бензински пумпи.
„Еуростар“ соопшти дека поради штрајкот откажал некои возови меѓу Лондон и Париз.
Како што се зголемуваат тензиите во втората по големина европска економија, штрајковите веќе се прелеаја и во други делови од енергетскиот сектор, вклучувајќи и во нуклеарниот гигант „ЕДФ“, каде што работите, кои се клучни за снабдувањето на Европа со енергија, ќе бидат одложени.
Претставник на синдикатот вчера изјави дека штрајковите влијаат на работата на 10 нуклеарни електрани, со дополнително одложување на одржувањето на 13 реактори и намалено производство на електрична енергија во Франција за вкупно 2,2 гигавати.
Во јавниот превоз се очекуваат големи прекини на локалниот транспорт, но и на меѓуградските возови и на париската железница. Можни се прекини во работата на училиштата и други јавни установи.
„Штрајковите се случуваат во тензичен политички контекст додека француската влада треба да го усвои буџетот за 2023 година, користејќи се со уставни овластувања кои би и овозможиле да го заобиколи гласањето во парламентот“, рече во саботата премиерката Елизабет Борн.
Предвидено е штрајкови да се одржат низ целата земја, а тој во Париз ќе почне напладне.
Илјадници луѓе во неделата излегоа на улиците на главниот француски град за да протестираат против покачувањето на цените.
Лидерот на крајно левичарската француска партија „Непобедливи“, Жан-Лук Меланшон, чекореше заедно со овогодинешната добитничка на Нобеловата награда за литература, Ани Ерно. Меланшон за денеска свика генерален штрајк.
