Твитер денеска повторно го суспендираше профилот на Канје Вест, само два месеци откако беше вратен, откако неговиот сопственик Илон Маск изјави дека ги прекршил правилата на платформата против поттикнување насилство.
Маск, кој себе си се нарекува апсолутист за слобода на говорот, го поздрави враќањето на раперот, сега познат како Је (Ye), на платформата во октомври.
„Дадов се од себе. И покрај тоа, тој повторно го прекрши нашето правило против поттикнување насилство. Профилот ќе биде суспендиран“, напиша Маск, доцна во четвртокот на Твитер.
Профилот на Вест беше суспендиран само еден час по објавата на Маск, која беше дадена како одговор на корисник на Твитер кој рече: „Ве молам Илон, решете го Канје“.
Твитер не одговори веднаш на барањето за коментар.
Пред да го суспендира профилот на Је, кој имаше преку 30 милиони следбеници, Твитер блокираше еден од неговите твитови.
Ројтерс не можеше да ја потврди содржината на таа објава.
Платформата на социјалните мрежи го врати профилот на раперот пред Маск да го заврши преземањето вредно 44 милијарди долари.
Маск подоцна појасни дека немал никаква улога во враќањето на Је на Твитер.
Је во четвртокот на Твитер објави фотографија од холивудскиот магнат Ари Емануел како со црево прска вода на задниот дел од главата на Маск.
Како коментар кон сликата напиша: „Секогаш го паметиме ова како мој последен твит #ye24“, пред да биде блокиран профилот.
Маск одговори дека профилот на Је е суспендиран поради поттикнување насилство, а не поради објавување „непривлечна слика од мене како Ари ме полева“.
Во ноември, Твитер повторно активираше некои контроверзни профили кои беа забранети или суспендирани, вклучително и сатиричната веб-страница „Babylon Bee“ и комичарката Кети Грифин.
Маск, исто така, одлучи да го врати профилот на поранешниот американски претседател Доналд Трамп, откако мнозинството корисници на Твитер гласаа за враќање на Трамп во анкета.
