Најмалку 12 луѓе загинаа, а околу 50 сè уште се водат како исчезнати откако свлечиште потопи два брода усидрени во речно пристаниште во перуанската амазонска прашума, јавија локалните медиуми.
Свлечиштето потопило еден траект и сериозно оштетило друг патнички брод на кој се наоѓале десетици луѓе, се наведува во полициски извештај.
Несреќата се случила вчера околу 5 часот по локално време, во момент кога патниците требало да се истоварат во Ипарија, во централниот регион Укајали.
Повредените се префрлени во болница додека националната полиција и перуанската морнарица трагаат по преживеаните. Се стравува дека меѓу исчезнатите има и деца.
Свлечиштето било предизвикано од ерозија на брегот на реката Укајали, извор на Амазон, соопшти на Х Националниот центар за вонредни операции на земјата.
Спасувачките операции се отежнати поради силните речни струи, објасни претставник на морнарицата. Како што јавија медиумите, околу 50 луѓе биле на еден од бродовите. Меѓу патниците имало деца, наставници и лекари.
Властите соработуваат со семејствата собрани на местото на катастрофата за да се обидат да го утврдат точниот број на исчезнати.
