Европските берзански индекси бележат раст, додека цената на нафтата Брент бележи благ пад на 103 долари, по новите изјави на американскиот претседател Доналд Трамп дека САД нема да го нападнат Иран пред изборите за Конгрес на 3 ноември. Тој додаде дека Вашингтон и Техеран водат „продуктивни разговори“.
Според податоците од берзата, Брентот утрово во 9:30 часот падна за околу 0,96 отсто, на 103,220 долари за барел, додека американскиот WTI забележа пад од околу 0,71 отсто, на приближно 90,808 долари. Во исто време, Трамп истакна дека американската поморска блокада на Иран останува на сила и повтори дека на Техеран нема да му биде дозволено да развива нуклеарно оружје, објави CNBC.
Пазарната реакција следи во пресрет на изборите за Конгресот. Според податоците од Американската автомобилска асоцијација (AAA), просечната цена на бензинот во САД изнесува 4,36 долари за галон, што претставува зголемување од околу 40 отсто во однос на претходната година.
На европските берзи, фјучерсите за гас на отворањето на берзата TTF во Амстердам се продаваа по 77,675 евра за мегават-час, односно околу 813 евра за 1.000 кубни метри. Германскиот DAX порасна за 0,79 отсто, францускиот CAC 40 за 0,85 отсто, британскиот FTSE 100 за 0,83 отсто, италијанскиот FTSE MIB за 0,81 отсто, додека московскиот IMOEX порасна за 0,02 отсто. На девизниот пазар, вредноста на еврото во однос на доларот изнесува 1,12312 долари.
Цената на златото се искачи на 4.193,35 долари за тројанска унца, а пченицата достигна 6,8429 долари за бушел (еден бушел изнесува 27,216 кг).
На ѕид-стрит, затворањето на тргувањето во четврток донесе различни резултати: Дау Џонс порасна за 0,1 отсто на 51.231,64 поени, S&P 500 падна за 0,47 отсто на 7.765,36 поени, а Nasdaq забележа пад од 1,25 отсто на 27.193,34 поени. Акциите на компаниите поврзани со вештачката интелигенција се соочија со пад откако CNBC потврди дека компанијата Open AI на крајот на септември постигнала годишна стапка на приходи од 50 милијарди долари, што е помалку од претходно објавената бројка од 68 милијарди долари.
